परिचय
यो सिर्भी मण्डली गोरखा नगरपालिका वडा नं. ११, सिर्टी, गोरखा जिल्ला, नेपालमा अवस्थित छ।
१) चर्चको संक्षिप्त इतिहास :-
यो चर्चको स्थापना मिति २०५६ साल कार्तिक २२ गते भएको हो। नुवाकोट जिल्लाको पूर्वतर्फको टुप्चे गा.बि.स. वडा नं. ४ र ५ साहुगाउँ र महादेव खर्क (हाल बिदुर नगरपालिका वडा नं. ७) तथा पूर्व देउराली गा.बि.स. वडा नं. ७ र ८ (हाल म्यागुङ गाउँपालिका वडा नं. ४) का दाजुभाइ र दिदीबहिनीहरूले प्रभुप्रति विश्वासका कारण सन् २०३५ तिर ठूलो विपत्ति भोगे र गोरखाको लामोगरा, घडेरी खोला क्षेत्रमा बसाइँ सरे। पञ्चायत कालदेखि नै लामोगरा भन्ने ठाउँमा एउटा चर्च स्थापना भएको थियो।
केही समयपछि करिब २०४४ सालतिर मिर्कोट गा.बि.स. वडा नं. ५ (हाल पालुङटार नगरपालिका वडा नं. ९, गोरखा) को घडेरी खोलाबाट गोरखा नगरपालिका वडा नं. ११ को सिर्भी भन्ने ठाउँमा सरेर शक्तिमण्डली नामक चर्च छोरी मण्डलीको रूपमा सुरु भई पछि मण्डलीको रूपमा विकसित भयो। स्थापना भएदेखि हालसम्म यस मण्डलीबाट १६ वटा छोरी मण्डली र ५ वटा समूहहरू स्थापना भएका छन्।
२) चर्चको मिशन क्षेत्र :-
यस मण्डलीका सेवाकार्य क्षेत्रहरू चर्च वरिपरिका सिर्टी, ओख्ले, १४ किलो, १३ किलो, १२ किलो, ११ किलोदेखि लिएर छेपेटार र वरिपरिका गाउँपालिका तथा अन्य जिल्लासम्म फैलिएका छन्। हालसम्म यस मण्डलीका हाटीगौडा चर्च, नरेश्वर चर्च, महातार स्याउली चर्च, खोप्लाङ चर्च, मिर्कोट चर्च, जोउबारी चर्च, भाचेके चर्च, मुचोक चर्च, बिचौर चर्च, सिम्ले चर्च, देउराली चर्च, टक्सार चर्च, नयाँ बस्ती चर्च, चैनपुर चर्च, छापाडाँडा चर्च र बोरलाङ चर्च गरी १६ वटा चर्चहरू स्थापना भई तिनका भवनहरू पनि निर्माण भएका छन्।
३) मिशन रणनीतिहरू :-
क) यस चर्चले आफ्नो मिशन पूरा गर्न विभिन्न रणनीतिहरू अपनाएको छ। शनिबार युवा संगति, बाल संगति र आराधना संगति, शुक्रबार उपवास र प्रार्थना संगति, बिहीबार दिदीबहिनी संगति, बुधबार घर संगति प्रार्थना गरी मण्डलीका विश्वासीहरूलाई आत्मिक रूपमा सुदृढ पार्ने कार्य भइरहेको छ।
ख) प्रत्येक तीन–तीन महिनामा सबै मण्डली चर्चका पास्टर नेताहरूको संयुक्त बैठक र सहभोज आयोजना गरिन्छ।
४) प्रभावहरू :-
यस चर्चका सेवाकार्य रणनीतिहरू मार्फत परमेश्वरको वचन धेरै ठाउँमा पुर्याइएको छ। माथि उल्लेख गरेअनुसार चर्च स्थापना कार्य सम्पन्न भएको छ भने अझ धेरै ठाउँमा सुसमाचार पुर्याई थप चर्चहरू स्थापना गर्नुपर्ने देखिन्छ।
५) निहितार्थ :-
यो चर्चले धेरै छोरी मण्डलीहरू जन्माएको भए पनि अझै सुसमाचार प्रचारका लागि मिशनरी पठाउन सकेको छैन। युवाहरूको आत्मिक उन्नतिका लागि तालिमहरू सञ्चालन गर्न नसकिएको देखिन्छ। दिदीबहिनीहरूको आत्मिक जागरण पनि तालिम सम्मेलनहरू सञ्चालन गर्न नसकिएकै कारण कम देखिन्छ। दाजुभाइहरूको सहभागिता पनि अझै सशक्त रूपमा सुरु हुन सकेको छैन। त्यसैले आराधना संगतमा दिदीबहिनीहरूको तुलनामा दाजुभाइहरूको उपस्थिति कम देखिन्छ। यी कमजोरीहरू सुधार गर्न सके आगामी दिनमा अझ राम्रो हुने निश्चित देखिन्छ।
६) निष्कर्ष :-
समग्रमा हेर्दा यो चर्चले प्रभुको कार्य राम्रोसँग गरिरहेको देखिन्छ। जुन कार्यहरू सम्पन्न भएका छन्, ती सबै प्रशंसनीय छन्। यदि सुसमाचारमा अझ जोड दिइयो भने यो चर्चले अझ उत्कृष्ट कार्य गर्न सक्ने देखिन्छ।
